Serokê dadgehê ku biryara êrîşê li ser parêzeran da, biryara domandina girtina Berdevka Demê ya TJA’yê Ayşe Gokkan da.
Rûniştina 22yemîn a doza ku Berdevka Demê ya Tevgera Jinên Azad (TJA) Ayşe Gokkan, bi îdîayên “rêvebiriya rêxistinê kiriye” û “endama rêxistinê ye” tê darizandin li 9emîn Dadgeha Cezayê Giran a Amedê hat lidarxistin.
Di rûniştinê de ku gelek aktîvîstên TJA’yê û nûnerên partiyên siyasî û rêxistinên sivîl beşdar bûn, malbat, parêzer, beşdar û Serokê Baroya Amedê Nahît Eren ji aliyê dadger ve ji salonê hatin derxistin.
Li ser vê yekê polîsan êrîşî beşdar, parêzer û malbatê kirin. Di heman demê de polîsan xwest ji malbata Ayşe Gokkan, Vedat Gokkan destgîr bikin. Her wiha xwişka wê Mihrîcan Gokkan ji ser hişê xwe ve çû û ew rakirin nexweşxaneyê.
Rûniştina dozê tenê bi beşdariya parêzeran berdewam kir. Parêzeran parastina miwekîla xwe Gokkan kir û xwestin were berdan. Dadgehê daxwaza berdanê red kir û biryara domandina girtina Gokkan da û danişînê taloqî 20’ê cotmehê kir.
Ji bo tevlêbûna danişîna Berdevka Demê ya Tevgera Jinên Azad (TJA) Ayşe Gokkan ku wê roja Yekşemiyê li Amedê bê dîtin, bang hat kirin.
22’yemîn danişîna doza bi îddîaya “rêveberiya rêxistinê kirin” û “endamtiya rêxistinê” ya derbarê Berdevka Demî ya Tevgera Jinên Azad (TJA) Ayşe Gokkan de hatibû vekirin, wê sibe li 9’emîn Dadgeha Cezayê Giran a Amedê bê dîtin.
Aktîvîstên TJA’yê, ji bo tevlîbûna danişîna Gokkan a heya niha 84 caran hatiye destgîrkirin û 167 caran lêpirsîn derbarê wê de hatiye destpêkirin, bang kirin.
Li gorî nûçeya Ajansa Mezopotamyayê aktîvîsta TJA’yê Belgîn Laçîn, bal kişande ser nasnameya berxwedêr a Gokkan û wiha axivî: “Gokkan ew jin e ku tevî hemû zextan jî, bi helwesta xwe ya serfiraz û bi rûmet destûr neda ku dîwarê şermê bê lêkirin. Ji bo ku dîwarên sînor bilind nebin, bedena xwe danî holê. Gokkan yek ji wan jinên Kurd e ku mirov pê serbilind bibe. Em ê bi pêşengtiya Gokkan têkoşîna xwe bi berxwedanê dewam bikin. Em ê li dijî hişmendiya ku li qadan jinan tune dihesibîne, tu carî paşve gav neavêjin.”
Aktîvîsta TJA’yê Bîrsen Guneş jî, têkoşîna jinên Kurd bi bîr xist û wiha got: “Gokkan ji ber ku mafên jinan, azadî, wekhevî, demokrasî û zimanê xwe yê zikmakî parastin, rastî bêhiqûqiyek mezin hat. Em ê daxwazên xwe yên azadî û wekheviyê bênavber biqîrîn.”
