November 23, 2020

Sinews *News and Opinions Site *Malpera nûçe û Şîroveyê *Haber ve Yorum Sitesi

Bahoz Erdal: PKK şer naxwaze, ji danûstandinê re amade ye

Endamê Fermandarıya Biryargeha Navendî ya Parastina Gel Bahoz Erdal diyar kir gerîla ti êrîşek li dijî hêzên PDK’ê pêk neanîye, berevajî hêzên PDK’ê bi çekên giran ketin herêmên gerîla. Erdal diyar kir ku ew amade ne bi PDK’ê re danûstandinan bikin û got, “PKK li hember dijmin şer dike, PKK naxwaze li dijî hêzên Kurd şer bike.”

Endamê Rêveberiya Biryargeha Navenda Fermandariya NPG’ê Bahoz Erdal derbarê amadekariyên PDK’yê yên şer li dijî gerîla û aloziya ku dewam dike ji Radyoya Dengê Welat re axivî.

Erdal, têkildarê mijara şandina hêzên Gulan û Roj yên PDK’ê ya herêma Garê diyar kir ku gerîla ti êrîşek li cihên pêşmergeyan nekiriye û got,

“Gerîla neçûye li Zaxo an jî Duhokê êrîşê cihê pêşmergeyan nekiriye. Hêzên Pêşmergeyan bi çekên giran bi awayek êrîşê ketin heremên gerîla.”

Erdal, destnîşan kir ku niha hin jî alozî heye û da zanîn ku cihên nû ava dikin, derdora heremên gerîla lê hene digirin û çekên giran tînin û hişyarî da ku bi vî awayî bidome, xeteriya ku vegere şer heye.

Bahoz Erdal: Pirsgirêka Başûr ne hebûna PKK’ê ye; hebûna dewleta Tirk a dagirker e

Erdal, derbarê daxuyaniyên PDK’ê ku dibêjin PKK li başûr dagirker e jî wiha dewam kir,

“Ji Şengalê bigire heya deşta Maxmûrû û Kerkûkê, ji berpirsiyarên PDK’ê kî devê xwe vedikir digotin ‘gerîlayên PKK’ê berxwedanekê lehengî dikin’ û spas dikirin. Di 2008’an de hêzên dagirkeriya dewleta Tirk êrîşê Zapê kir. Wê demê jî berpirsiyarê PDK’ê ji serokê heremê bigire heya yê jêr, berxwedana gerîla ya Zapê pîroz kirin. Wê demek bibêjin gerîla qehreman e û demek bêjin dagirker e û bi devê dewleta Tirk biaxivin. Kes ji van gotinan bawer nake.”

Erdal diyar kir ti aciziyeke gelê başûr li hember PKK’ê nîne û got,

“Pirsgirêka Başûrê Kurdistanê ne hebûna gerîla ye. Pirsgirêka Başûrê Kurdistanê hebûna 37 baregehên dagirkeriya dewleta Tirk e û îstîxbarata dewleta Tirk e. Dibêjin ‘bila gerîlayên PKK’ê derkevin’. Ma dema çeteyên DAIŞ’ê êrîşê we kir, ev 37 baregehên dewleta Tirk alîkariya we kir an jî gerîlayên PKK’ê alîkarî kir?

Erdal, bal kişand ser aloziya li herêma Garê ku dibe bizivire şer û diyar kir ku ew naxwazin şerekî bi vî rengî derkeve û ew dixwazin rewş aram bibe û got,

“Em dixwazin pirsgirêkên heyî bi diyalogê çareser bibin. Lê ger aliyê din di hewildana şer de israr bike û êrîş bike gerîla jî wê xwe biparêze. Em li hember dagirkerên Kurdistanê şer dikin. Erdogan çiqas dijminê gelê Bakur be ewqas dijminê gelê Başûr e jî.”

Bahoz Erdal: Divê pêşmerge nekevin şerekî ku xizmeta dewleta Tirk bike

Bahoz Erdal diyar kir di nava rêveberiya PDK’ê de hin kes hene dixwazin şer derkeve û da zanîn divê Serokê PDK’ê Mesûd Barzanî ji bo berjewendî û yekîtiya Kurdan bixebite.

Erdal, destnîşan kir ku eger şerekî li başûr biqewime wê, zirarek mezin bide desketî û şoreşa Rojava jî û diyar kir yê ku berê çeka xwe bide hêzeke Kurd ew xiyaneteke netewî dikin.

Erdal diyar kir ew li dijî şer in û ji bo danûstandinan amade ne û bang li gelê Kurd û hemû derûdoran kir ku xwedî helwest bin.

Her wiha bang li pêşmergeyan jî kir ku nekevin şerekî ku xizmeta dewleta Tirk a dagirker bike.