Mahfuz YILDIZ

Dengê vî ji kûrde tê, wek Çemê Behedê, wek Dicle dilorine.

Di serî de tu dibêjî ‘’ev çi deng e’’ lê dema tu xwe pêva berdidî

Cîhanek rengîna ji destan û folklora gelê te, ji serpêhatîyan, ji coş û şahîyan, ji derd û keserên miletê tê radixe berçevên te

Vê demê, tu hes diki ji vî dengî, tu dibî yek bi dengî re û deng dibe neynik ji his û ramanên te re û tu, bi rêzdarî serê xwe ditewînî ji vê hunermendîya xwerûya xweser re.

Bi harmonîya muzîk û derng re, raman û his  xwe lihev dipêçin û te li hespekî xeyalîyê bi bask swar dikin berbi gelî û zozan,  gund û bajarên Kurdistana rengîn ve

Zaroktîya te tê ber çevên te, çîrok û klam û stran, govend û şahî û dîlan, şîn û girîn û feryad lihevdigerin

Dengbêj li dîwanê rûdinên û tevgêrek Kurdewar xwe berî rehên te dide, di xwîna te de hêdî hêdî ber bi dilê te ve hildikişe.

Tekoşer û şoreşger, serîhildêrên serînetewandî slavan li te dikin.

Ev deng dengê Koçer e, Koçerê Farqînî, Koçerê Amedî, Koçerê Kurd

Ku hunera xwe ji kultura hezarên salan ya Kurd girtîye û bi muzîka modern ya cîhanê ve girêdaye.

Van rojan albumek vî ya nûyî balkêş derket pêşberî me gohdaran

Albumek birastî gelek ciwan û nûjen û giranbuha ye lê balkêşîya albumê ne tenê ev e!

Di dengê Koçer de Ahdullah Pêşew diqîre û dibê ‘’Ho General’’ û beşera xweş ya bi xwe û hevalên xwe û gelê xwe bawer General Mazlum Abdî û berxwedana Rojava ya ku keç û lawên Kurdan yên cengawer û şoreşger barbarên herî tund yê cîhanê, ji bo xatirê tevahîya mirovên ser rûye vê erdê, têkbirin, tîne berçevên me.

Koçer diqîre û Selahedîn Demirtaş tê ziman, bi me re dipeyiv. Koçer dibêje ne qaydeyê min e bi tirkî sitirîn lê min ji bo qedrê Kek Selahedîn min helbesta vî vernegerand û raste rast bi zimanê tirkî xwend.

Kek Selahedîn bi devê Koçer tê ziman,

‘’Sûc be sûc e

dibên bila roj dernekeve,

 Ji hevîya aşîtîyê re demançeyan dikşînin,

 tu bi bazdan radiperî li hemberî wan,

 û ew te sucdar derdixin

Lê emê bikenin, wê demê emê bikenin,

 bila sêwî nemînin raperîn

Sûc be sûc e biraoo,

bitenê bila neçilmise kenê mirov!’’

Koçer didomîne, Keçikek anarşîst, sembola Raperîna Parka Gezîyê, Keçika Kiras-sor, berê xwe dide qada berxwedanê

Koçer naraweste…

Hafizaya Kurd ya bi derd û kulan radixe peşberî me

‘’Çil Suwarên Xeyal Firoş’’, çil qehremanên Kurd, bi hewar û gazî hespên xwe dibezînin lê çi bikim

‘’Devzelinkê Mihemed Tunc’’ li Cizîra Botan di nav xwune de mane

Qetlîama Agirî û Dersimê tevlî qetliama Roboskîya Qilabanê dibe…

Û Koçer, me bi dengê bilura xwe wek Seydayê Gerok li çîyan, li qadên berxwedanê digerîne

Geh di govendek Medî de, me bi strana ‘’Nabkeve ha Nabkeve’’ tîne cojê

Geh dibe Cegerxwîn û dibê ‘’Lo lo Pismamo çima deng nakî, leşkerê dijmin l’çîyayê jorîn, weka xweş mêran jihevbelanakî’’

Û geh dibe Arame Tîgran Çevrêtîya Keçika bedew dike

Me got ev Koçer e û emê lê zêde bikin, bêjin  ka gelo Koçer kî ye?

Çi kirîye û çi dike?

Birêz Koçer, gelo hûn dikarin ji me re, ji xwîner û şopînerên Sînewsê re hinekî qala xwe bikin, hûn kengê ji dayik bûn, we li ku xwend, asta perwerdeya we çi ye?

Ez di sala 1967 de li Silivanê, Farqînê ji dayik bûm, min Liseyê ji derva de xwedn û li Stenbolê di Akademîya Hunerê ya Stenbolê de ez li ser muzîk-teknolojîyê perwerde bûm. Dîsa li heman Akademîyê li ser fotografkêşî û sînemayê jî min perwerdeya xwe domand.

Yanê dema em qala Koçer dikin, em dikarin bêjin tu hem muzîsyen û hem fotografkêş û hem jî sînemager î?

Belê rast e, di wan her sê huneran de jî gelek berhemên min hene.

Min di sala 1990î de albuma xweya pêşî ya muzîkê Rêwiyên Azadîyê qeyd û bela kir. Ji wê rojê heta niha yazdeh(11) albumên minî muzîkê hene ku îsal min û Çetin Hoca bihevre albuma Payizê qeyd kir û Çil Siwarên Xeyal Firoş ku we li jorê qal kirîye, bi piranî gotin û muzîk aîdî min e, min biserêxwe tomar kir.

Belê, ji kerema xwe re, danasîna we em bidomînin. Di warê sînema û fotografkêjîyê de çi berhemên we hene heta niha?

Di sala 2004 de ji bo Televizyonek biyanî ez li ser dokumanterîya Mewlana xebitîm. Min hem derhênerîya wênesazîya dokumantarê û hem derhênerîya muzîka wê bihevre meşand. Ji sala 2005 heta sala 2016yan ez wek derhênerê dokumantarî-belgefilmê ji bo Televizyonek bîyanî xebitîm. Ez hem derhêner û derhênerê wênesazîyê jî bûm û bi serde, montaja xebatan jî min bixwe çê dikir.

Hunermendîya we hem hunerî û hem teknîkî ye, ez bawerkim di nav me Kurdan de kesên awha gelek kêm in, ne?

Belê, niha ez di warê muzîkê de jî bi vî awayî dixebitim. Yanê ez muzîkbêj im, ez aranjor, grafîker û derhênerê muzîka xwe me, gotin û besteyên stranên xwe  jî bi piranî ez dinivîsim û nota dikim.

Gotinek Şirnexîya heye, dibên, ê babo, willah tu camêr î vêca!

Ez mineta kesî nakşînim, kar û îşên xwe, ligor bikêrbûna xwe digerînim

Ji 1992 û bi vir de ez xwedîyê sazîya produksiyonê me, min heta niha zêdetirî 200 album ji gelek hunermendan re qeyd û belav kirîye. Min derhênerîya wan û grafik û prodoktorîya wan bihevre meşandîye.

Di warê belgefilman de çi xebatên we hene gelo?

Niha nêzîkî 10 belgefîlmên min hene

Belgefilmên bajarên Kurdistanê

Amed, Mêrdîn, Ruha, Van, Semsûr û Heskêfê(Hesenkêf)

Û her wiha li ser kultura Kurdan wek belgefîlma Kî Zava-Dewetek Kurdan û Ser-hivde(Girê Miradan).Serhivde, di 17yê meha Nîsanê de wek festîval tê pîrozkirin, gel li ser zîyaretgehek li alî Farkînê şahîyê datîne.

Wekî din jî ez dikarim qala xebata xwe li ser dengbêjîyê bikim, ez karim bêjim  min bi dengbêjên ku niha li jiyanê ne tevan re pêwendî danîye û belgefîlmên wan kişandîye.

Li alî din, min nêzîkî 50 video klîp kişandîye û derhênerî û montaja wan bixwe kirîye.

Di warê fotografkêşîyê de hûn karin çi bêjin ji me re?

Min heta niha wêneyên gelek gund, navçe û bajarên Kurdistanê girtîye ku arşîv kirîye

Çend mînakên xebatên min awha ne:

Telqin

Jinên Mazidaxê (Şermex)

Ev herdû wek pêşengeha wêneyan hat organîze kirin

Û wekî din jî

Erdnîgerîya Silîva(Farqînê)

Jinên Azad

Govenda Jinên Kurd xebatên minî wênekêşîyê ne

Û dîsa

Albumên minî muzîkê jî awha ne:

Koçer – Rêwiyê Azadiyê

Koçer – Min Çi Dit

Koçer – Çêroka Şevê

Koçer – Emre Demirhan – Mezopotamya’dan Anadolu’ya

Koçer – Koçber

Koçer – Hawra Nuh

Koçer – Stranên Bijartî 1

Koçer – Stranên Bijartî 2

Koçer – Stranên Zaroktîyamin

Koçer – Çetin Hoca – Payîz

Koçer – Çil Siwarên Xeyal Firoş

Belê Rêzdar Koçer, bi qasî ku xwuyaye, hûn hunermendekê piralî, multî-huner in.

Niha bila pezindan tê de nebe lê li Yilmaz Guney bifikire, nivîskar e, derhêner e, aktor e, ma gelo kî dikare bêje karên Yilmaz Guney bi qisûr bûn?

Dîsa hinek şexsîyetên Kurd hene hem şanoger in, hem helbestvan in, hem nivîskar û derhêner û leyistikvan in û her karê wan jî li wan tên

Belê, ez nabêjim ‘ez Yilmaz Guney im’ lê ez jî jibo hafizaya gelê xwe, li gorî têgihiştin û hunermendîya xwe xebatan dikim.

Rêzdar Koçer ez jî ji we re li xwe mikur bêm, îtiraf bikim , herçend ez we ji zûdeye dişopînim jî, min nizanibû ku hunermendîya we awha giranbuha ye. Min digot Koçer jî ji stranbêjên Kurd, stranbêjek e lê her ku ez bala xwe didim xebatên we, ez têdighejim ku hunermendîya we xwerû, kûr û mayînde ye. Hizmetek layikê gelê Kurd yê berxwedar e.

Gelek spas jibo peyvên we yî xweş. Belê em hev ji salên 1998 heta niha nas dikin. Wê demê me hev li derdora rojnameya Azadîya Welat didît

Rast e, em xwendevaên zanîngehên Stenbolê li derdora  Navenda Çanda Mezopotamyayê û Avahîya Azadîya Welat dicivîyan. Wê demê Kovara Pîne jî hebû ne wisa?

Belê reveberê wê Mazlum Dogan bû, merivekî samîmî û bikêrhatî bû

Erê ha, Wek şekrokê nav kaxizan bû…

Wek şekirên buha yê eydîyan…

Belê, wisa ye. Rêzdar Koçer wekî din hûn dixwazin çi bêjin ji xwendevan û şopşînerên me û gohdar û heskirîyên xwe re?

Karên ku ez dikim tev li ser kultura Kurd û jiyana Kurdewar ya Kurdistanê ne, ji Rojhilat heta Rojava, ji Başûr heta Bakur ez li gelek deveran gerîya me, min rengan, dengan berhev kirîye û jibo hafizaya Kurd danîye arşîvan.

Ez dixwazim bêjim, ger sazî û kesayetîyên Kurdperwer hebin, li Kurdistan, li Ewropa, Amerika û Canada, em dikarin van xebatan raxin pêşberî çevên Kurdan û gelên cîhanê

Û her wekî din jî ez dikarim bêjim ku xebatên gelek suprîzane jî li ber destên min jibo çap û pêşengehan hene!

Birêz Koçer ez wek rojnameger Mahfuz Yildiz û li ser navê SÎNEWSê spasîya we dikim, gelek saxbin ji bo we me neşkênand û hevpeyvîna me qebûl kir.

Ez jî spasîya we dikim jibo vê hevpeyvînê û slavên xwe dişînim ji Amedê ta Amerika, Canada û Ewropayê re

Danasîna Albuma dawîn jî ev e

ÇİL SIWARÊN XEYAL FIROŞ 2011-2020

ÇIL SIWARÊ XEYAL FROŞ

GOTIN & MUZÎK: KOÇER

ARENJE: KOÇER

NATEBITE

GOTIN & MUZÎK: KOÇER

ARENJE: KOÇER

SUÇSA SUÇ

GOTIN/SÖZ: SELAHATTİN DEMİRTAŞ

MUZÎK/MÜZİK: KOÇER

ARENJE: KOÇER

LOLO PISMAMO

GOTIN: CÎGERXWİN

MUZÎK: ARAM TIGRAN

ARENJE: KOÇER

QILABA

GOTIN & MUZÎK: KOÇER

ARENJE: KOÇER

NABIKEVE

GOTIN & MUZÎK: GELERÎ

ARENJE: KOÇER

HO GENERAL

GOTIN: ABDULLA PEŞÊW

MUZÎK: KOÇER

ARENJE: KOÇER

NAVÊ MIN DESTANE

GOTIN & MUZÎK: KOÇER

ARENJE: KOÇER

KEÇÊ

ÇAVKANÎ: ARAM TIGRAN

ARENJE: KOÇER

Bir cevap yazın

E-posta hesabınız yayımlanmayacak. Gerekli alanlar * ile işaretlenmişlerdir